Luita Verde denuncia verquidos de entullos e lixo no petrogrifo Abelaires

O Colectivo Ecoloxista presentou este 15 de maio no Concello de Cangas e na Delegación Territorial en Pontevedra da Consellería de Cultura,
Educación e Ordenación Universitaria senllas denuncias contra dun verquido incontrolado de entullos e lixo e afeccións por abrasión nos
gravados na área de proteción do xacemento catalogado da Idade do Bronce das Abelaires asi mesmo Ben de Interese Cultural de Galicia.

Con varios gravados xeométricos de circos concéntricos con cazoletas e liñas con apéndices, está ubicado á beira do sendeiro ecolóxico de
Grande Percorrido do Morrazo (GR-59) na parroquia canguesa de Aldán perto do límite co concello de Bueu e na base do Monte Liboreiro, onde
existe outro xacemento castrexo-romano e medieval.

Xa é a terceira vez en 10 anos que Luita Verde denuncia afeccións á área de proteción deste petróglifo e resulta totalmente paradóxico que
os verquidos se sigan producindo malia proximidade do punto limpo de recollida de resíduos voluminosos da Mancomunidade de Concellos do
Morrazo.

Responsabiliza á administración pública do abandono do ben cultural, onde a mesma Mancomunidade de Concellos do Morrazo incumpríu a posta
en valor para este xacemento arqueolóxico, que a Dirección Xeral de Patrimonio dictou o 16 de maio de 2001 no seu informe favorable ao
Estudio de Efectos Ambientais do Complexo Medioambiental de RSU do Morrazo, na actualidade construído tamén nas proximidades do
petróglifo.

Luita Verde solicitou a retirada dos verquidos e a posta en valor do petróglifo.

MANIFESTO EN DEFENSA DA LINGUA GALEGA

   Hai dous anos que entrou en vigor o malfadado decreto 79/2010, do 20 de maio, para o plurilingüismo no ensino non universitario de Galicia. Un decreto que, segundo denunciamos no noso manifesto de xaneiro de 2010, constituía, e constitúe, un atentado á lingua galega e, polo tanto, un atentado á cultura e á identidade de Galicia.

   Os resultados corroboran a nosa denuncia, que se suma á denuncia de todas as organizacións que defenden a nosa lingua. O necesario tratamento do galego como lingua propia de Galicia, o dereito dos nenos e nenas a recibir educación na súa lingua, a función do galego no ensino como lingua vehicular e centro de gravidade do modelo de bilingüismo, a necesaria discriminación positiva do galego para acadar o seu inserimento na cultura e nos afectos da poboación hoxe del afastada e, como resultado, a normalización do seu uso, todos estes obxectivos e ferramentas foron varridos polo decreto 79/2010.

   En consecuencia, reiteramos o manifestado hai dous anos:  

Non podemos admitir que siga en vigor un decreto que pretende lexitimar o abandono da lingua polos poderes públicos e interromper a súa transmisión interxeracional. Non podemos consentir que se menoscabe o dereito dos e das galegofalantes a usar, conservar e transmitir a lingua propia como legado, e que se impida a normalización do seu uso polo resto da poboación. Non podemos tolerar que a miseria intelectual, a inconsciencia e a insensibilidade dos que se avergoñan de seren galegos ou galegas sirvan como xustificación espuria dunha pretendida liberdade para destruír unha lingua que é o noso máis prezado patrimonio cultural e un valioso patrimonio da humanidade.

Ler o resto desta entrada »

Mapa crítico de Galiza 2012

Dende a Rede de Dereitos Sociais sacamos á luz o mapa crítico de Galiza 2012, un traballo colaborativo de denuncia e oposición á destrucción do País.

Este Mapa crítico Galiza 2012 pretende ser unha sintética plasmación gráfica das agresións e conflitos que, relacionados co medio, son sinalados e problematizados politicamente por infinidade de colectivos sociais do pais que se opoñen cotidianamente a destrución que o modo de explotación capitalista impón sobre o noso territorio.
Baixo tres eixos necesariamente subxectivos (medio, sociedade, economía) tratamos de recoller nesta cartografía crítica, algúns dos elementos centrais na loita pola defensa do que é de toda a cidadanía, do Procomún: ‘esa constelación de recursos que debe ser activamente protexida e xestionada na busca de manter o ben común’.
Unha ferramenta para sinalar xeograficamente os puntos críticos onde estase a dirimir o futuro dos nosos ecosistemas sociais que, poren, precisa para ser efectiva da materialización física e tanxíbel de esas loitas con as que pretendemos, colectivamente, transformar e conquistar o futuro.

* Este Mapa crítico está adicado a todas aquelas persoas anónimas que, combativas e rebeldes, poñen o corazón e a cabeza na defensa de este pais. A todas, pero en especial a unha: Xosé Reigosa, un galego bó e xeneroso, un imprescindíbel. Vai por tí Xosé!

Mapa crítico Galiza 2012 descárrega aqui:
http://rede.blogaliza.org/2012/04/30/mapa-critico-de-galiza-2012/

Domingo 13 de Maio: III Andaina pola proteción da Serra do Galinheiro

Saída: Aparcamento do campo de futbol de A Pasaxe, Vincios ás 10:30 h.

Chegada: Parque Forestal do Galinheiro, Vincios ás 14:30 h.

Lonxitude aproximada: 10 Km., faise en tres horas e media ou catro.

Nivel: medio-baixo, sendeiros doados e con poucos tramos de desnivel.

Despois: lectura do manifesto e xantar popular com a comida que leve cada quen. Haberá música e animación.

www.serradogalinheiro.org

O Goberno proíbe a manifestación en Melide mais… iremos á festa!

Aínda que non é habitual que se denegue o permiso para exercer o dereito a manifestarse, nesta ocasión a Delegación do Goberno, seguramente preocupada pola incidencia dun acto molesto para os plans da Xunta e das empresas responsables das fumigacións, decidiu aplicar o prazo mínimo de solicitude, entendendo que non hai motivos que xustifiquen a urxencia da convocatoria.

Se cadra se fosen fumigar con carácter inmediato a casa do delegado do Goberno, aplicaría un criterio diferente, pero isto é o que temos.

Xa que logo, a Plataforma decidiu renunciar a realizar unha manifestación pero mantemos a cita prevista con todos na Foliada de Melide, para realizar información cara a cara e participar como outros cidadáns máis na festa melidense. Informemos en animada e festiva conversa aos nosos paisanos en Melide! Festa con conciencia! Festa activa!

Domingo, 29 de abril ás 11:00 en Melide: Acción contra as fumigacións, cun isecticida tóxico, nos montes de eucalipto

O 29 de abril, às 11:00 na feira en Melide, a Plataforma contra as fumigacións. Por un futuro sen pesticidas desenvolverá unha acción de protesta, en contra das fumigacións masivas que pretenden facer nos montes de eucaliptos contra a plaga do goníptero cun insecticida que causa entre outras cousas a morte das abellas, fundamentais para realizar a polinización e polo tanto relacionadas directamente coa colleita de alimentos. Os responsables principais desto son a Asociación de fabricantes de pasta de papel, que pagan a fumigación, e a Xunta e Concellos que promoven a recollida de sinaturas para que os propietarios autoricen as fumigacións.
Pasearemos pola feira de Melide con máquinas sulfatadoras, máscariñas, outros con traxe de abelleiros, para chamar a atención. Repartirase o manifesto da plataforma e haberá unha intervención pública explicando o que pretenden facer e porqué nos opoñemos.
Se queres obter máis información sobre o tema podes visitar o sitio
http://fumigacionsnon.org/
Para que non nos tiren veneno por riba maniféstate en Melide o 29!

Comunicado no Día Mundial Da Bicicleta

NON A PENALIZACIÓN DO USO DA BICICLETA NA CIDADE DE VIGO

O pasado 15 de Marzo, ás 20:30, D. F. I. circulaba en bicicleta polo carril-bus da rúa Lopez Mora, en direción cara o centro da cidade, cando os axentes municipais nº 440 e 429, da patrulla C-4, o pararon, o obligaron a identificarse e tras telo retido durante uns 25 minutos, tramitáronlle unha multa de 200 €, considerando como infracción grave “circular en bici por un carril reservado a Bus/Taxi”.

Os colectivos Bouzas-móvete, Luita Verde, Salvemos Monteferro, Verdegaia, C.S. A Revolta e C.E. Maúxo consideramos esta sanción como un abuso e un ataque ao uso da bicicleta na cidade, xa que neste concello non se promociona nen se facilita o uso da bicicleta senon que se penaliza, aínda que esta sanción sexa debida a un exceso irracional de celo por parte dos axentes que a tramitaron ou a un desproporcionado afán recadatorio por parte do concello de Vigo.

Ler o resto desta entrada »

Domingo 22 de Abril: manifestación en Lalín contra a incineración

Comunicado de “A Ría Non Se Vende” sobre a Área Metropolitana

A ÁREA METROPOLITANA DE VIGO

Agora que o goberno galego da Xunta acaba de aprobar unilateralmente a lei de creación da área metropolitana de Vigo comeza o seu fracaso amosado na inmediata loita dos poderes políticos polo seu control (Xunta, Deputación de Pontevedra, Concello de Vigo e Concellos da bisbarra), tal e como veu sucedendo tamén nestes anos previos a súa elaboración. Pero alén diso, a problemática vai mais alá do que se recolle nos medios.

As áreas metropolitanas, por moito que se as catalogue como funcionais –son funcionais aos intereses de expansión e reprodución do capital- son un absoluto fracaso no ámbito estatal e internacional, fundamentadas nun desenvolvemento totalmente insustentable do sistema capitalista globalizado, que pouco a pouco e a marchas forzadas está desmembrándose trala última (pode que derradeira) grande crise que nos está tocar vivir.

Ler o resto desta entrada »

14 de Abril no Irixo, Festival reivindicativo contra a incineración do lixo

A chuvia nom vai ser problema, xa que haberá carpas

14 de Abril, as 12:00, Marcha pola declaración de Monte Pindo Parque Natural

CONCENTRACIÓNS CONTRA A QUEIMA DO PAÍS PARA BENEFICIO DE SUXOS INTERESES EMPRESARIAIS

Desde a rede de colectivos “Galiza Non Se Vende” apoiamos as concentracións convocadas para o día de hoxe luns 2 de abril, en distintas cidades do país, en resposta ao desastre intencionado das Fragas do Eume.

Mobilízate contra os que queiman o país e os que o consenten coa sua nugalha!

Horarios das concentracións cidadáns que se están a convocar para hoxe, luns 2 de Abril, ás 20:30:

A Coruña: nos Cantóns;
Vigo: no Sereio;
Compostela: no Obradoiro;
Pontevedra: na Ferrería;
Lugo: diante do Concello;
Ourense: diante do Concello
Pontedeume ás 20:00 diante do Concello.

ESPALLA! REACCIONA!

Este incendio é gravísimo, non é un incendio máis, nin é un acidente casual, asemella ser unha operación premeditada, igual que muitos dos lumes nos últimos anos.
Os montes que están ardendo son «zonas eólicas» e «zonas forestais», a «repoboar» con muiños e eucaliptos.

Queimar as Fragas do Eume e rebaixar o seu gran valor natural beneficia a muitos intereses:

1. Proxecto de Celulosa nas Pontes. Precisa dun área de eucaliptos próxima, e as Fragas do Eume son unha zona húmida onde terían un gran crecemento. O sector madeireiro leva anos comprando parcelas na zona.

2. Plano de Restauración da Mina das Pontes. Segundo o proxecto é imposíbel evitar as filtracións de carbón e metais pesados que producen contaminación contínua no río Eume. Ao ser um espazo protegido tan valioso, hai posibilidades de que haxa que pagar elevadas sancións.

3. Minas de andaluzita. Proxecto mineiro dunha empresa de capital inglés e surafricano a carón das Fragas do Eume que provocaría un grande impacto neste espazo natural.

4. Proxeto de novo encoro no Eume. O aproveitamento hidroelétrico do Eume para Endesa vai camuflado no financiamento da clausura da mina das Pontes.

Proxecto de ampliación da Rede Natura 2000 de Galicia

Galiza Non Se Vende ven de presentar alegacións á proposta de ampliación da Rede Natura 2000 de Galicia elaborada pola Dirección Xeral de Conservación da Natureza, nos seguintes termos:

Galicia conta cunha media de 17,4 tipos de hábitats de interese comunitario por cada 100 quilómetros cadrados, máis do dobre da media da península ibérica, que se sitúa en 8,3 hic/100 km2. E no seu litoral acada os 35 hic/100 km2. Galicia é a terceira comunidade do estado en número total de tipos de hábitats de interese, só por detrás de Andalucía e Cataluña. A pesar destes datos, Galicia só aporta á Rede Natura o 11,8% da súa superficie terrestre, cando a media entre comunidades é do 24,5%, e o conxunto do estado protexe mediante esta figura o 27,2% do territorio.

• Coa ampliación proposta, a Rede Natura acadaría soamente o 15,2% da superficie terrestre de Galicia. Á luz dos datos anteriores, esta proposta tan escasa resulta incomprensible. Dada a riqueza ecolóxica de Galicia, os seus espazos naturais protexidos deberían acadar alomenos un terzo (33.3%) do seu territorio. E os espazos mariños protexidos deberían acadar unha extensión parella. Isto suporía multiplicar como mínimo por 2,8 a superficie actual da Rede Natura galega. Non se trata dun aumento desmesurado, trátase de que o nivel de protección actual é desmesuradamente baixo.

• Para acadar esta superficie, a rede propón a inclusión dos terreos presentes no Rexistro Xeral de Espazos Protexidos, que foi creado en 1991 e que, dende a creación da Rede Natura, permanece nunha especie de limbo legal. Soamente na provincia de Pontevedra a inclusión destes espazos, que actualmente teñen a clasificación de solo rústico de protección de espazos naturais, significaría a adición de case 20.000 hectáreas ás 27.786 declaradas actualmente.

• A superficie do Rexistro, con todo, sería insuficiente. Ademais de crear novos LIC e ampliar os actuais, é preciso a creación de corredores biolóxicos protexidos, que eviten que a rede sexa un arquipélago de illas afastadas entre si, e que aseguren a súa conectividade ecolóxica e súa viabilidade biolóxica.

Un exemplo: GNSV asume a proposta realizada dende a Plataforma pola Defensa dos Montes do Morrazo, consistente en crear un novo LIC chamado “Montes e Carballeiras do Morrazo”, que comunique a Rede Natura dos LIC costeiros de Cabo Home, Cabo Udra e a Enseada de San Simón co interior da provincia de Pontevedra, integrando os montes e serras máis sobranceiras da península morracense (Montes do Morrazo e Carballeira de Coiro, xa incluídos Rexistro Xeral de Espazos Protexidos, máis os montes de Lourizán, Outeiro de Campolongo/Monte Cernello, montes de Ardán, montes de Cela, serra da Magdalena, monte Borrallido, montes de Varalonga e montes do Hio) todos eles con hábitats naturais e fauna e flora de interese comunitario.

• GNSV une a súa voz á doutras organizacións e reivindica especificamente a ampliación de varios LIC existentes, e a creación de novos LIC, que en total suman 23 espazos de interese, dentro do espazo bioxeográfico atlántico.

• A alegación de GNSV describe 21 de estes espazos: Estaca de Bares, Ortigueira, Cabo Udra, Costa da Soavela, Enseada de San Simón, Illas Estelas-Monteferro, Costa Ártabra, Fragas do Eume, Xuvia-Castro, Betanzos-Mandeo, A Ramallosa-Foz do Miñor, Esteiro do Baixoi, Río Belelle, Río Sor, Río Baleo, Ría de Ferrol, Encoro das Forcadas, Montes e Carballeiras do Morrazo, Xunqueira do Lagares, Río Tea e Gándaras de Budiño, dentro do espazo bioxeográfico e climático atlántico.

• Ademáis, Galiza Non Se Vende uniuse a un grupo de 40 asociacións e colectivos para asinar conxunta e solidariamente dúas alegacións específicas sobre outros dous espazos de enorme valor natural, arqueolóxico e etnográfico: a Serra da Groba e a Serra do Galiñeiro.

• Pero a reivindicación de Galiza Non Se Vende non se limita a estes 23 espazos, senón que se extende a toda Galicia, baixo os criterios xa descritos: É preciso seleccionar todos os espazos de valor natural e acadar a protección de, alomenos, o 33,3% do territorio. Tamén é preciso manter e, no seu caso, rexenerar estes espazos, evitando a súa degradación, procedendo á súa reordenación sustentable, potenciando os seus valores e recursos naturais e recuperando as súas áreas degradadas.

Protexer o territorio e os seus espazos naturais nos termos descritos require unha conciencia clara do valor do medio como soporte de toda vida, como vínculo identitario, como legado interxeracional, como fonte de emprego sustentable e como fundamental inversión vital, cultural e socioeconómica a curto, medio e longo prazo.

Galiza non se Vende en solidariedade cos mariscadores de Ferrol acusados polos feitos do 2007

Campaña de Solidariedade cos mariscadores

Campaña de Solidariedade cos mariscadores, promovida polo

Comité Cidadán de Emerxencia para a Ría de Ferrol

Os dias 22, 26 e 28 de Marzo 9 mariscadores comparecerán diante do Xulgado do Penal de Ferrol, polo acontecido en maio de 2007, cando o Comité Cidadán de Emerxencia (CCE) levou a cabo as accións de protesta para impedir a entrada ilegal na Rïa dos primeiros gaseiros, cargados con GNL, rumbo a Reganosa e nas que participaron centos de persoas. O fiscal lles imputa os delitos de resistencia e grave desobediencia á Autoridade, e solicita penas que van desde máis de 3 anos para o expatrón maior a dous ou inferiores para os restantes.

 Lembramos que a planta de gas de Reganosa e unha instalacion ilegal, perigosa, deficitaria e innecesaria que acelera a destrución do ecosistema da Ría. Prevista a súa instalación no Porto Exterior, foi relocalizada no interior da Ría somentes, para facilitar ao grupo Tojeiro unha operación especulativa que lle reportou preto de 5.000 millons das antigas pesetas.

Nun primeiro momento a Fiscalia inmputou a 63 mariscadores, que logo rebaixou a 9, ademais desestimou a autoinculpación das persoas do CCE que participamos na acción. A estratexia da fiscalia pretende diluir a causa real do conflito: a planta de gas de Reganosa e que o xuizo teña a menor repercusión pública.

 A defensa da Ría de Ferrol non só compete aos mariscadores/as. O conxunto da cidadanía témola que defender. E inaceptable a persecución dese colectivo pois é vítima dunha situación cuxos responsables seguen actuando con total impunidade.

 O CCE chama a cidadanía, a todas as orgaizacións patidarias, sindicais, entidades cívicas, ecoloxistas, a expresar a súa solidaridade co colectivo dos mariscadoras/es, na defensa do emprego, da Ría e da súa recuperación, mediante comunicados públicos e actos de apoio e acompañándoos os días 22, 26 e 28 de marzo diante dos Xulgados de Ferrol.

 Asemade solicitamos de todos os colectivos e particulares sensibilizados, a axuda economica para afrontar a defensa xurídica dos mariscadores procesados, que podese facer efectiva a través da seguinte conta bancaria no Banco de Santander, titular: Luz Marina Torrente e outros, en concepto de “axuda defensa xurídica a mariscadores”, C.C.C.: .0049 3315 77 2894017995

Engádese Folleto do CCE en apoio aos Mariscadores

Dende a Rede Galiza Non Se Vende unímonos á proposta: “Monte Pindo Parque Natural”.

Galiza non se Vende, apoia os dez puntos que fundamentan esta petición:

Estamos firmemente convencidos de que o Monte Pindo merece e debe ser proclamado Parque Natural. Os fundamentos principais que avalan a nosa convicción son os seguintes:

 
1. O Monte Pindo é un dos montes máis míticos e coñecidos da Costa da Morte e tamén de Galicia, polas súas raras calidades xeolóxicas, pola presenza de abondosas especies naturais protexidas e únicas, polos mitos e a historia que o rodean, e por ser un dos principais recursos de futuro non só do seu entorno inmediato senón de toda a zona.
2. No Monte Pindo conxúgase unha privilexiada posición xeográfica, un cumio de 627 metros situado xusto a rentes do mar e encadrado pola praia de Carnota (a máis longa de Galicia) ao sur e pola Fervenza do Ézaro (a única de Europa que cae sobre o mar, desgrazadamente anulada por un encoro) ao norte.
3. Na actualidade o Monte Pindo e o seu entorno natural está abandonado e abocado ao progresivo deterioro. As ameazas (incendios, vandalismo, campismo agresivo, incursións en vehículos motorizados…) medran cada día, polo que se fai apremiante actuar sen perder máis tempo.
4. A declaración do Parque Natural artellaría mecanismos para, desde o consenso social de todos os sectores, estudar os seus problemas e atopar solucións.
5. A declaración do Parque Natural xeraría por si mesmo un número de postos de traballo.
6. A declaración do Parque Natural suporía a dotación dunha partida presupostaria específica, o que non se da con outras figuras de protección.
7. A declaración do Parque Natural incrementaría a prioridade presupostaria de toda a área de influencia do futuro parque, incluso a nivel de investimentos non estrictamente ligados ao medio ambiente.
8. A declaración do Parque Natural abriría múltiples posibilidades de revitalizar a produción non industrial (mar, agro, madeira, artesanía, etc…) de toda a zona, podendo incluso crearse un “selo de calidade” que suporía un valor engadido para os produtos de toda a área de influencia.
9. A do Parque Natural é unha “marca” moi prestixiosa e xera por si mesmo unha afluencia de “turismo verde”, o que conlevará un forte impacto de visitantes “de calidade” que sen dúbida incidirá no sectores turístico, hostaleiro e comercial de toda a zona
10. Todo o anterior, unido á proximidade do Cabo Fisterra, de Monte Louro… pode impulsar dun xeito definitivo o bo nome da Costa da Morte como referencia dun turismo de calidade nacional ou mesmo internacional.

Por todo isto, entendemos que o Monte Pindo reúne todas as calidades necesarias para ser nomeado o 1º parque natural da Costa da Morte e o 7º de Galicia, e asi no-lo confirmaron todas as voces autorizadas que se levan pronunciado ao respecto.